Jan
1
【咦﹗肥咗喎﹗】度蜜月返港後… 蘇太王菀之身材圓潤
Filed Under CH
啱啱喺美國新婚蜜月返港嘅王菀之（Ivana），噚晚同Super Girls、陳詩欣及周志文參與荃灣除夕倒數活動，榮成為蘇太嘅Ivana，身材比結婚時圓潤，雖然未能跟老公蘇卓航（Eric）過婚後首個除夕倒數，不過大會就安排一位小男孩扮成迷你版Eric送花獻吻，0氹得Ivana非常開心。
藝人們又跟現場觀眾玩互動遊戲，Super Girls成員Yanny跟現場觀眾一齊勝出獲贈智能手錶，踏入元旦一刻，Super Girls成員更攬作一團互相祝賀。
跟老公經已對足一個月，但只是分隔少少時間而出席活動，Ivana笑指迷你Eric已令佢更掛住老公，問到Eric點解唔一齊嚟倒數？佢話：「人多怕醜，今次去度蜜月，佢多咗好多身份，因為期間我要出騷同拍MV，佢就做咗我助手、同事、化妝整頭。」
追問佢身材圓潤係咪有喜？佢斷言話：「我嘅肥同迷你Eric無關，我一人做事一人當，我嘅肥係食番嚟。」佢嘅新年願望想同老公多啲創作結晶品，大家便指婚後首個大計，應該係快啲有愛情結晶品，佢即刻面紅玩手指話：「呢啲冇得預。」
講到度蜜月是否不設防，佢就問咩叫不設防，聽到解釋後就急急話：「唔講呢啲。」然後再扯開話題指未習慣叫Eric父母做老爺奶奶，另外，佢又話要再加強廚藝，希望做到入得廚房的太太。
Super Girls成員Yanny希望將好運帶到新一年，隊長Aka希望能夠開再大型演唱會，問到若果吳業坤喺今晚叱咤奪獎會否再喊？身邊姊妹們即幫口指好多歌手得獎都會感動到喊，再問到Aka會否睇好坤哥得獎？Aka話：「睇好，佢作為新人就入最喜愛男歌手五強已經係贏。」佢指坤哥故事係好正面，帶出一種勵志感覺。
Comments
Leave a Reply
You must be logged in to post a comment.