Jan
18
【真．專訪】講身份認同戥周子瑜唔抵河國榮：我係香港人
Filed Under CH
真．香港人河國榮，最近因為喺「毛記電視分獎典禮」Rap出《真．香港地》，香港人like爆洗版，雖然河國榮來自澳洲，但操一口流利廣東話嘅佢，好明顯已經係「真．香港人」，本報今日同佢於深水埗石硤尾街夠晒地道嘅大排檔做專訪，問到佢覺得自己係咪香港人，河國榮爽快表示:「我係，我係香港人，我都喺度28年。」 佢仲應記者要求，用自己嘅電話播出《香港地》伴奏，即席Rap出《真．香港地》，同大家一樣「同熱愛這片土地」。
講到今日嘅羅志祥及周子瑜事件，羅志祥喺活動上話:「不用那麼細，大家都是中國人。」網民轟佢有台灣原住民血統，竟然話自己係中國人，搞到佢fb粉絲狂跌。問河國榮點睇呢件事，佢話:「佢係台灣人，話自己係中國人，好明顯係怕中國政府啦，喺中國做生意方面。」佢又話幾乎全世界都知道佢哋係被迫講嘅，所以唔會有人信。
河國榮對周子瑜事件嘅睇法，係覺得唔啱:「睇到佢間公司中國好多生意，迫到佢唔好揮台灣旗，錢係萬能嘅。」
再問到港足嘅韓裔教練曾經講過:「我願意為香港而死。」問河國榮會唔會都係咁諗?佢笑言:「我會唔會為香港而死? 未知(笑)，呢啲老實說話，好多事幻想時就話我哋肯，真實時調返轉唔肯，O依家講話肯為香港而死，O依家講之嘛，點知到時係咪真，o依家講係冇意思，同埋死有好多方法。」
Comments
Leave a Reply
You must be logged in to post a comment.