【傳媒寒冬】全職變兼職仲減薪囡囡為家燕媽媽唔抵

Filed Under CH

新城董事總經理馬健生今早率領約五十員工參加公益金百萬行，盛傳馬將接手新城所有非財經節目。訪問中，馬健生亦承認傳聞所指謂新管理層認為娛樂節目賺唔到錢，但她強調「資源重新分配一定會有，唔止係新城。」

馬健生又稱:「娛樂都係生活一部份，所以仍然會有娛樂、音樂節目，只係少咗；家燕姐、阿Bob、林柏希佢哋仍然喺度，娛樂仍然會留番。」更揚言如果嚟緊娛樂係多人鍾意嘅話，都會加番。

獲董事總經理「點名」的家燕姐，今早亦有參加百萬行。其實前日新城派大信封之日，一度傳出家燕姐榜上有名。結果最後家燕姐「有得留低」，但其節目《開心家天下》即日停播，改為星期六做新節目《開心大派對》，拍檔仍是阿Bob同范振鋒。

家燕姐個女石祐珊為母不值:「其實媽咪嘅工作量只係調動咗，由平日一至五轉咗星期六播出一日。雖然開咪時間少咗，但多咗時間去準備。」至於家燕姐接受電話訪問時，就講咗啲……唔係太明嘅「術語」:「因為嚟緊要配合番個科技，所以個節目會優質化去做，專訪都會另類啲，仲會多啲街訪同獎品。」

家燕姐又笑言:「以前一個星期錄三日，依家都係，不過只係集中晒一日播出啫，咁仲好呀，唔使一朝早起身趕返工，而且個節目會配合埋個app，聲畫同步。」

至於合約方面，由全職變成兼職，薪金自是減少:「睇份約係有變動嘅，人工亦係少咗，但如果可以多啲人同我一齊工作，我都好樂意咁做。以前都試過，轉過幾代。」

會否覺得是因為新城出現盈警先至咁做？佢話:「都唔止係新城，好多同業喺新一年都面對同樣問題，所以更加要未雨綢繆。」家燕姐又承認新城嘅娛樂節目比例係會少咗，但相信《勁爆》頒獎禮係會繼續。

Comments

Leave a Reply

You must be logged in to post a comment.