Sep
17
【容不下一個古箏】歐錦棠指關土地問題事秋生：搬屋呀？搵港鐵啦！
Filed Under CH
乘客運洗衣機、床褥，乘客帶關刀、長槍，但未見有職員阻止!不過，繼月前香港前亞運桌球金牌選手陳國明，因帶「過長」球棍乘搭列車遭港鐵發警告信事件後，前晚一名中學女生因孭着一個同佢身高相若嘅古箏，被大圍站港鐵職員截停，指其古箏盒長度超過港鐵行李規定，最後女生被「請」離開車站。
其實，港鐵規定行李長、闊及高總和，不得超出170厘米，東鐵線則規定行李不得超出23公斤重，不過，就連有乘客運洗衣機、床褥都冇阻止，隨即引起社會各界指斥港鐵全無人情味，只識放生水貨客卻有「蝦細路」之嫌，行為形同選擇性執法。
黃秋生今早就於facebook表示：「搬屋呀？搵港鐵啦！搬屋呀？揾港鐵啦！搬屋呀？揾港鐵啦！(古箏除外)。 走水貨呀？搭港鐵啦!……」暗寸港鐵容得下一個洗衣機、一張床褥，又可以畀水貨客運大大件嘅行李，就容不下一個學古箏嘅中學生。
歐錦棠今日凌晨亦在facebook貼出公仔圖，圖中所見一個孭住古箏盒嘅女學生，眼見別人正在搬運雪櫃而覺得不悅，明顯係質疑港鐵雙重標準，留言：「學生被禁止攜帶古箏上火車兼被阻止前行，咁唔准坐火車，唯(惟)有坐的士啦，但係新界的去晒落馬洲車水貨客喎，點解？人哋起錶百五蚊喎…」
歐錦棠又續道：「咁不如call Uber啦，但係又輪到的士佬嘈喎；咁call貨van當貨啦！唔得，學生話冇咁多錢喎。唓！冇$學乜人玩大件樂器呀？吹笛咪算囉！同埋點解會冇錢㗎？⋯因為爸爸份糧唔夠咁用⋯唓！點會唔夠用㗎？⋯因為大部分用咗交租⋯唓！講嚟講去原來又係土地問題！ 但係⋯⋯咦？點解啲水貨客大大件暢通無阻嘅？媽，我好亂呀。」世事都被佢看透，真係又關土地問題事!? 
Comments
Leave a Reply
You must be logged in to post a comment.