Sep
4
網民熱話：近十屆港姐冠軍邊個最索？
Filed Under CH
無綫年度盛事《2015香港小姐競選》已經圓滿結束，並由大熱門「十優狀元」麥明詩奪冠，呢位新出爐港姐冠軍喺賽前已經受人注目，事關佢嘅高學歷嚇親唔少人！有網友忽發奇想，將最近十屆港姐冠軍比併一番，仲話如果佢哋一齊參選同一屆，究竟邊個會勝出？網民梗係有唔同心水啦，但佢哋都不約而同推舉生完BB都咁索嘅2006年港姐冠軍陳茵媺同有「混血靚樣」嘅2013年港姐冠軍陳凱琳！
陳茵媺性格樂觀身材又正
首先係兩子之母嘅2006年港姐冠軍陳茵媺（Aimee），參選港姐時留有一頭黑色長髮嘅Aimee被人大讚清純有氣質，加上一對電力十足嘅笑眼同甜美嘅笑容，真係融溶化唔少宅男嘅心！有網友話Aimee每次都樂觀面對隆胸及整容等負面新聞，咁大方得體自然加晒分啦！不過網友最like都係Aimee嘅好身材，擁有34D驕人上圍嘅Aimee參選時已經被封為「枕頭胸」，為老公陳豪生完兩個寶貝仔上圍再升cup添，網友大讚Aimee生完身材仲咁好又索，依家再出嚟參選港姐都會sure win！
陳凱琳勁有氣質
同樣係網友心水嘅2013年港姐冠軍陳凱琳（Grace），勝在有靚樣又有高學歷，談吐大方得體更被網友大讚係「美貌與智慧並重」！輪廓分明嘅Grace唔單止被讚似混血兒，仲話佢甚有星味，似足大美人李嘉欣咁靚。有網友仲話Grace身材一啲都唔輸蝕，身材夠晒平均，佢着泳衣時仲散發着健康性感feel，咁有氣質完全取勝啦！
難怪一班網友都心大心細唔知揀邊個好，仲話Grace同Aimee如果參選同一屆實鬥到難分高下添！唔知近十年嘅港姐冠軍，包括：2006年陳茵媺、2007年張嘉兒、2008年張舒雅、2009年劉倩婷、2010年陳庭欣、2011年朱晨麗、2012年張名雅、2013年陳凱琳、2014年邵珮詩同今年嘅麥明詩，大家會揀邊個做冠軍中嘅冠軍？
網民有話兒：
你真XXX：我既（嘅）心水就當然係陳茵媺，佢長髮好睇，短髮更好睇，佢再參選實走唔甩三甲！
XX項XX：緊（梗）係揀陳茵微（媺），有樣有身材，特別係佢對笑眼，真係電死人，仲要生完都咁鬼索。
MIXXXXX：好難揀，但肯定陳凱琳同陳茵媺會鬥到難分高下。
XKAX：識揀一定揀陳凱琳，有靚樣又有高學歷，談吐大方得體！
西楚XX：美貌與智慧並重，講緊既（嘅）咪就係陳凱琳囉！佢當選時仲比（畀）人話係近十年最靚嘅港姐冠軍，冇理由唔揀佢！
Comments
Leave a Reply
You must be logged in to post a comment.