Aug
13
【由幕前轉做文職】過朝九晚六生活寸嘴Barbie做慳家OL
Filed Under CH
「寸嘴Barbie」夏尉喻早前完成電影拍攝工作後，因為荷爾蒙失調影響身體狀況，經歷肥腫難分，同心理障礙困擾，令佢頓時失去自信面對鏡頭，最嚴重時直頭唔想見人，但為咗生計，總不能坐食山崩，決意搵工轉投文職發展，0依家喺科學園一間搞app公司做巿務助理，過住朝九晚六生活已經4個月喇。
轉做OL後Barbie收起性感，衣着撲素，唔使拋胸搵食，日前直擊佢OL生活，Barbie自製沙律返公司食lunch ，佢自認慳家話：「我以前開工拍戲時都會自己帶牛奶同粟米片，不嬲都好慳，仲會坐公共交通，喺好急情況先會call的士。」
幕前多姿多采變為OL唔係人人適應，Barbie話：「我係小巿民，都係一份工作，但工作模式的確可以對調理身體有幫助，我個病最緊要作息正常。」Barbie強調做OL唔等於放棄娛樂圈，只係想學多樣嘢，有工作都會照做，亦有自我增值進修舖路，仲講笑話：「話晒都i.t界，我只係返咗短短四個月，的確冇咩建樹，會繼續摸索，0依家每日返工都係同同事傾偈度idea。」
講到0依家同以前收入，Barbie話：「幕前單件都等於0依家月薪，但呢份工勝在穩定，幕前唔係成日有工作。」Barbie預計多半年時間休養，就可以完全康復，0依家定期見醫生，推拿治理，最緊要作息正常。
Barbie份工到底做啲乜？其實主要係推廣公司啲app，有時要出去見客，認得佢寸嘴Barbie會唔會易話為啲呢？Barbie話：「客人只會睇貨真價實，如果認得我嘅人，只會慳返打開話題呢part，佢哋會話你好熟面口喎，但最終都係好實際，完全冇着數。」Barbie打扮比以前專業，再唔會袒胸露臂，尤其見女客戶時一定唔會低胸。 
Comments
Leave a Reply
You must be logged in to post a comment.