Jul
31
【狗仔出更】戴夢夢食飽上波子太極Ricky鬼祟換走自訂車牌
Filed Under CH
戴夢夢最近搭上太極樂隊鼓手朱翰博(Ricky)，二人譜出忘年戀，Ricky更被爆瞞住老婆，同夢夢搞婚外情，曾被捉姦兩次，當時Ricky聲稱同老婆搞緊離婚，仍然住喺老婆嘅寓所，之但係，就繼續同夢夢拍拖四圍去。
噚日本報收到讀者報料指夢夢喺華星客棧現身，其後，本報發現未見男友Ricky陪佢食飯，原來係風水師傅吳佩孚，邀請夢夢、蘇永康同張立基等飯聚。噚晚張立基亦喺微博貼出佢哋嘅合照，留言：「多謝吳佩孚師傅請食飯……好食。」
食到晚上十點左右，夢夢忽然行咗出餐廳，男友Ricky揸咗架白色波子嚟接佢，夢夢先上車講咗幾句，跟手又落車行番入餐廳，行過見到喺餐廳門口抽煙嘅莊思敏，夢夢都有上前同莊思敏傾咗幾句，之後，先再上男友Ricky架波子走人，未知係唔係男友Ricky怕被影到，冇掛平時嘅自訂車牌，反而掛咗個普通車牌。
蘇永康同張立基就約11點同五、六個友人行出餐廳，其間蘇永康亦有同餐廳職員影合照，跟手同張立基同車離開。
另外，莊思敏、陳庭欣同黃百鳴噚晚都去咗華星餐廳一齊開餐，食食吓，莊思敏同男友人行咗出門口抽煙，阿妹莊思明亦企隔離陪家姐，11點幾左右先食好，黃百鳴同友人坐Benz走，莊思敏同莊思明就各自走人。 
Comments
Leave a Reply
You must be logged in to post a comment.