Jul
21
【斷線1分鐘】無綫話冇死SER：唔排除有少少人玩唔到
Filed Under CH
無綫節目《超強選擇1分鐘》噚晚一出爐就出事，變成《超強斷線1分鐘》，觀眾大失所望，明明答啱咗0架嘛，點知苦等廿分鐘，都係白等，難免鼓譟。而且之前港姐搞全民投票已有過死server歷史，令人不禁再請阿寶出動……人類總要重複同樣的錯誤……
TVB執行董事兼總經理鄭善強今日接受傳媒訪問時，被問及節目噚晚是否冧server，鄭善強強調，唔係死server，而係其中一個位技術上有「少少問題」，而且佢哋玩呢個投票遊戲，其實係想推動互動電視嘅發展，加強即時定感。
鄭善強表示:「我哋絕對唔係server冧，因為噚晚我哋問咗三個題目，其實最後一個我哋係成功收到觀眾12萬票，第一個問題收到超過7萬票，第二個收到11萬8。無論幾十萬，或者一百萬，觀眾同時俾票我哋，系統絕對係測試得好好，我哋測試咗成個半月0架喇，都係冇問題。」
咁今次問題喺邊？鄭善強表示：「每一次開始遊戲，當主持人宣佈依家開始玩呢個遊戲時，我哋要即刻將資料輸入電腦度，由嗰樣嘢控制觀眾可唔可以投票，咁做係加強遊戲真實感、現場感俾觀眾，亦都係冇問題，但係原來發覺喺呢個位，嗰個技術有少少問題，我哋已經即時調節咗，第二個同第三個都玩到。」
鄭善強再謂：「我哋絕對相信，喺一分鐘入面收到12萬人投票，係代表晒差唔多所有人玩到，我唔排除有少少人玩唔到，但唔會多過幾個percent嘅人想玩但係玩唔到。」鄭善強強調系統係健全嘅:「只不過呢個位，當好多人入嚟，短時間，講緊係幾秒鐘，講俾個server聽要投票，咁我哋點樣可以做得好啲呢？過去好多個鐘，我哋不斷優化呢個系統，令佢唔會話要等到第三個問題先玩到，我哋絕對有信心，我哋見到嘅問題係會解決到。」let’s see。 
Comments
Leave a Reply
You must be logged in to post a comment.